Viti i Ri ku do i kalojne pushimet VIP-at shqiptare

Nata e ndërrimit të viteve do të festohet në mënyra të ndryshme nga personazhet VIP. Më të preferuarit mbeten Mali i Zi dhe Maqedonia ndërkohë që një pjesë e mirë e tyre, kryesisht politikanët, trokitjen e 1 Janarit do e presin në shtëpi. Ja si do e presin Vitin e Ri disa prej tyre…

Elvana Gjata – Data 31 Dhjetor do e gjejë në Zvicër. Këngëtaren e presin një sërë koncertesh dhe nata e ndërrimit të viteve do të jetë e rastësishme në këtë vend. ‘Kam patur shumë koncerte dhe jam ende e angazhuar me to. Pres që në Tiranë të kthehem në datën 10. Do bëj pak pushim dhe koncertet nëpër vende të ndryshme të Europës do të nisin sërish’- tregon ajo.


Elvira Diamanti – Vitin e Ri do ta festojë jashtë kryeqytetit. Do të udhëtojë drejt Durrësit për të kaluar një natë të këndëshme familjare duke pritur momentin e ndërrimit të viteve. Aktorja e mirënjohur Elvira Diamanti do të jetë e shoqëruar nga bashkëshorti dhe dy fëmijët e saj, vajza dhe djali.

Ola dhe Esdalini – Angazhimet e shumta dhe provat intensive për programet e ndryshme që po përgatiten me rastin e fundvitit në Top-Channel, kanë bërë që dy balerinëve, Olës dhe Esdalinit t’u prishen planet për në Maqedoni, ku dhe kishin vendosur të kalonin datën 31. ‘Jemi shumë konfuzë për momentin pasi kemi shumë punë. Mendoj se do të shkojmë në Kavajë tek familja ime. Do festojmë tek lokali i quajtur ‘Fiore’, mjaft i preferuar ky nga tiranasit. Pastaj pas datës 6 Janar fillojnë ‘Ethet’ dhe duhet të jemi për to’- thotë Esdalini.

Jonida Maliqi – Ka preferuar të shkojë në një zonë malore edhe pse nuk i pëlqen shumë i ftohti. Bashkë me të fejuarin e saj Genti, kanë zgjedhur Mavrovin e Maqedonisë, vend ku të gjithë kënqen duke bërë ski. ‘Nuk kam shkuar ndonjëherë në Mavrov. Më kanë thënë që është bukur. Unë vetë nuk jam natyrë e borës, nuk e dua të ftohtin dhe kam gjithmonë shumë ftohtë. Por gjithsesi, mendoj se do kaloj bukur’- thotë Jonida.

Namik Dokle – Deputeti i Partisë Socialiste Namik Dokle preferon të qëndrojë në shtëpi natën e ndërrimit të viteve. Nuk do t’I largohet Tiranës por do të qëndrojë pranë familjes së tij. Në datën 1 Janar ai shprehet se do të festojnë me disa çifte të tjerë, miq te vjetër. ‘Do të mblidhemi diku për të festuar. Kalohet mirë mes miqsh’- thotë Dokle.

Erjon Braçe – Siç duket pjesa më e madhe e politikanëve do të qëndrojnë në Tiranë. Kështu do të ndodhë edhe me deputetin socialist Erion Braçe. ‘Bashkë me gruan dhe vajzën do të festojmë në një vend në periferi të Tiranës. Kemi zgjedhur një lokal të këndëshëm në Sauk. Kështu do ta presim 2008-n’- tregon Braçe.

West Side Family – Edhe pse pjesën më të madhe të kohës janë të ndarë, gjithsecili në vendin ku kanë zgjedhur të punojnë, data 31 do i gjejë bashkë. Duke festuar të tre por në të njëjtën kohë edhe duke kënaqur njerëzit, të cilët kanë preferuar të festojnë në ambjentet e ‘Xibrakut’. Do të këndojnë atje, disa nga materialet e tyre më të suksesshme ndërkohë që planet për ditët në vijim ia lënë kohës apo zgjedhjeve spontane.

Rezarta Shkurta – Edhe këngëtaren simpatike Rezarta Shkurta e presin 2 koncerte të mëdha të cilët do të zhvillohen gjatë natës së ndërrimit të viteve. Bashkë me të fejuarin e saj Ermalin, i cili e shoqëron në pjesën më të madhe të koncerteve që shkon, Vitin e Ri do ta festojnë në Maqedoni. Qëndrimi i Rezartës në shtetin fqinj do të zgjasë për disa ditë.

Erjon Veliaj – Nuk do t’i largohet kryeqytetit duke preferuar të festojë në Tiranë Vitin e Ri. Do të jetë një darkë mes dy familjeve, të tij dhe të të fejuarës së tij Ajolës. ‘Nuk desha të largohem nga Tirana. Si çdo vit tjetër Vitin e Ri dua ta pres me nënën time dhe nuk mund ta lë vetëm. Me nënën time dhe me Ajolën dhe prindërit e saj do të festojmë bashkë ardhjen e 2008-s. Pas datës 1 Janar, do të më vijnë disa miq të vjetër, ndaj dhe mund të lëvizim me ta nëpër vende të ndryshme, por Brenda Shqipërisë.’- tregon Veliaj.

Genta Ramadani – ‘Me dy kolopuçët që kemi nuk kemi ku të shkojmë përveçse në shtëpi. Do ta presim aty Vitin e Ri’- kështu shprehet Gentiana Ramadani. ‘Gjithsesi nga data 3 besoj se me Edin do të dalim diku. Dua të shkoj në një vend ku kërcehet. Në një pub. Kam kohë pa kërcyer, qëkur mbeta shtatzënë dhe mezi pres sa të vijë çasti e të kërcej fort, të çmallem’- përfundon Genta.

Bamir Topi – Shumëkush do të mendonte se familja presidenciale do të zgjidhte një vend tejet të veçantë për të festuar Vitin e Ri, patjetër jashtë kryeqytetit, por jo! Presidenti Topi ka vendosur të festojë në vilën e tij në Tiranë, pa frekuentuar asnjë vend tjetër. Kjo do të jetë nata e ndërrimit të viteve për kreun e shtetit, me bashkëshorten e tij Teuta dhe vajzat Nada dhe Etida.

Sajmir Tahiri – Nata e Vitit të Ri do të mbledhë familjen e tij me të të fejuarës Fatlinda. Pas trokitjes së gotave me familjarët në datën 31, data 1 Janar do ta gjejë Sajmir Tahirin dhe të fejuarën e tij në Kolashin të Malit të Zi. Një vend mjaft i bukur me borë ku do të provojnë të bëjnë edhe ski. ‘Kështu menduam të festonim këtë vit. Na pëlqejnë vendet me borë’- tregon tahiri.

Majlinda Bregu – Edhe ministrja e Integrimit Majlinda Bregu do ta kalojë natën e Vitit të Ri në shtëpi me familjen. Ndoshta fillimisht ka qenë një zgjedhje mes Tiranës dhe Durrësit për të festuar por në fund, është vendosur që familja të festojë pranë gjirit të saj. ‘Fëmijët janë të vegjël dhe mendojmë të qëndrojmë në shtëpi. Jemi më qetë kështu dhe themi se festohet më bukur’- shprehet Bregu.