Hilton rrëmben ish-bashkëshortin e Spearsit, Federline

Pasanikja e Hollywoodit, Paris Hilton, prapë nuk po rri rehat. Së fundi, sipas mediave amerikane, ajo është hedhur në përqafim të ish-bashkëshortit të këngëtares Britney Spears, Kevin Federline.
Hilton, e cila vetëm një vit më parë kishte filluar të shoqërohej me problematikën Britney, është parë duke kaluar çaste goxha “intime” me Kevinin, në një klub të natës në Los Angeles.
“Pa dyshim që Paris dhe Kevin dukeshin të lumtur. Ai tërë kohën e përqafonte dhe e puthte, ku herë pas herë i pëshpëriste në vesh”, ka thënë një burim i afërt me ngjarjen.
Sidoqoftë, kjo nuk është hera e parë që Britney është tradhtuar nga miket e saja. Më herët, aktorja Lindsay Lohan kishte kaluar çaste të hareshme me ish të dashurin e saj, regjisorin, J.R. Rotem.