Alketa Vejsiu me Grabockën në TV Klan

Se çfarë do të jetë saktësisht projekti që do të rikthejë në ekran Alketa Vejsiun, duket se nuk është vizionuar akoma në dosjet e regjisores Vera Grabocka. Por, një gjë është e qartë tashmë: do të jetë një program i përjavshëm në TV Klan, që mendohet të nisë në muajin shkurt.
Ndërkohë stafi i ngushtë i Grabockës e ka nisur punën për të konkretizuar këtë projekt që mendohet të jetë një gërshetim i emisionit “SOS” - që është transmetuar për shumë kohë në Vizion Plus – dhe emisionit të njohur italian “C’e posta per te”.

Me sa duket regjisorja ka vendosur të shkëputet disi nga spektaklet e bukurisë apo dhe nga koncertet gala, për të realizuar një emision më popullor, ku protagonistë do të jenë njerëzit e thjeshtë sa me hallet aq edhe me historitë e tyre rozë.

Ndaj dhe prezantuesja e saj e preferuar, Alketa Vejsiu, mendohet të shfaqet me një rol krejt ndryshe nga gjithë herët e tjera.

Nuk dihet ende se si - përderisa formati është ende një ide e pashtjelluar - por kontakti me njerëzit e thjeshtë do t’i kërkojë Alketës një prezantim ndryshe, një profil paksa më të pjekur se te spektaklet që ajo ka drejtuar deri më tash.

Profil që tani më mirë se kurrë më parë, ajo mund ta krijojë fare mirë: sepse tani ajo është një mami Alketa, me këmbët në tokë që i kupton shumë më mirë – nga ç’mund t’i kuptonte më parë - problemet e vërteta të njerëzve.