Të gjitha divorcet e personazheve VIP gjatë vitit 2007

Ndarja e Rudina Magjistarit nga Edi Rama
Një prej çifteve më interesantë të kryeqytetit është ndarë gjatë vitit 2007. Në fakt flitej se kriza në marrëdhëniet mes kryebashkiakut të Tiranës dhe Rudina Magjistarit kishte nisur kohë më parë. Gjithsesi lajmi është bërë publik në fillim të vitit të shkuar, kur duket se ky fakt ka marrë nota zyrtare. Megjithatë edhe përpara këtij momenti,çifti kishte kohë që nuk shfaqej së bashku në aktivitete publike. Që nga ajo kohë, as në krah të Edit dhe as në krah të Rudinës nuk është shfaqur një partner i ri.

Rozana Radi dhe dashuria që mori fund
Edhe pse identitetin e të dashurit të saj nuk preferoi asnjëherë që ta bënte publik, Rozana Radi kishte treguar se në jetën e saj kishte një mashkull. Të paktën deri në vitin 2007, kur u publikua edhe lajmi i ndarjes. Kështu ajo i shtohet listës së personazheve publikë, që kanë pësuar ndarje gjatë vitit 2007.

Ingrit Gjoni ndahet nga i fejuari pas dy vitesh bashkëjetesë
Edhe për Ingrit Gjonin, viti 2007 ka shënuar ndarje.Këngëtarja i ka dhënë fund lidhjes pas dy vitesh bashkëjetesë.Ky ishte një vendim tërësisht i saji dhe ka qenë ajo, që ka vendosur të mbyllë këtë marrëdhënie duke mos dhënë shumë komente për mediat, madje duke u përpjekur ta mbante sekret, por pa ia arritur. Me sa duket, pas dy vitesh jetesë së bashku Enea dhe Ingriti kanë gjetur tek njëri-tjetri shumë gjëra, që i ndajnë dhe që ndoshta nuk i kishin njohur më parë. Për këtë arsye këngëtarja ka marrë vendimin që t’i japë fund kësaj lidhjeje duke u përpjekur njëkohësisht, që ky lajm të kalonte në heshtje dhe pa dhënë komente rreth shkaqeve. Edhe pse ka kaluar një kohë e gjatë, që nga ai moment duket se deri tani në jetën private të Ingritit nuk është shfaqur asnjë mashkull. Të shohim çdo të ndodhë në këtë vit të ri.

Albërie Hadërgjonaj divorcohet
E ndërsa në verën e vitit 2007, Albërie Hadërgjonaj jetoi një moment të bukur, atë të rikthimit të bashkëshortit në shtëpi, më pas gjërat nuk do të shkonin aq mbarë.Pak muaj më pas, këngëtarja do të deklaronte divorcin. Ajo dhe Mentori mësohet se u ndanë vetëm disa muaj pas daljes së tij nga burgu, ndërsa asnjëherë nuk janë folur për motivet konkrete, duke e konsideruar si një lidhje të ftohur. Gjithsesi tani dy vajzat e këngëtares vazhdojnë të jetojnë me të ëmën, ndërsa Mentori jo. Na mbetet të kujtojmë shprehjen e Mentorit në ditët e para pas daljes nga burgu, se “Pjesa më e vështirë ka qenë për Albërien”, e cila tashmë pas viteve të gjata të pritjes, vazhdon të jetë vetëm.

Rovena Stefa ndahet nga i dashuri
I dashuri i saj ishte një shqiptar nga Maqedonia. Por edhe lidhjes së Rovena Stefës me të i erdhi fundi, vetëm pak kohë përpara ndërrimit të viteve. Megjithatë mësojmë se këngëtarja dhe ish-i i saj kanë ruajtur relata shoqërore.

Fjodora Fjora i jep fund lidhjes 9-vjeçare
Lidhjes së saj 9-vjeçare Fjodora Fjora i ka dhënë fund gjatë vitit 2007. Pikërisht në fillim të stinës së nxehtë në faqet rozë të mediave shqiptare u publikua lajmi i ndarjes së gazetares Fjora nga i dashuri i saj. Ndonëse u përpoq ta mbante larg vëmendjes së mediave këtë aspekt të jetës së saj private, duket se Fjodora nuk arriti t’ia dilte dot mbanë. E megjithëse që nga stina e verës kanë kaluar disa muaj, duket se në jetën e Fjodorës ende nuk është shfaqur një lidhje e re.