Britney Spears kthehet në shtëpi, arrin t’u shmanget mediave

Britney Spears është kthyer në shtëpi. 26 vjeçarja është lëshuar nga qendra spitalore Cedars-Sinai në mëngjesin e së shtunës dhe disi ia ka arritur t’u shmangej reporterëve.

Disa orë më vonë, një numër i madh fotografësh dhe reporterësh ishin mbledhur përpara shtëpisë së këngëtares, duke u munduar të kuptojnë për gjendjen e saj apo edhe të shohin pop yllin, që kishte arritur në shtëpi me veturën e saj të markës ‘Mercedes’.
Rreth njëqind reporterë kanë pritur me orë të tëra jashtë shtëpisë së Spears-it, por as ajo as përfaqësuesit e saj nuk kanë dalë për t’u prononcuar për media. Ndërkohë, fqinjët janë ankuar në polici duke kërkuar nga ta që t’i largojë reporterët.
Spears ishte dërguar me auto-ambulancë në spital, në mëngjesin e së premtes, pas një konflikti me ish-bashkëshortin Kevin Federline lidhur me kujdestarinë e fëmijëve, për zgjidhjen e të cilit konflikt është dashur të ndërhynte policia.
Spears dhe Federline kanë dy djem, Sean Preston, 2 vjeçar, dhe Jayden James, 1 vjeçar.
Disa ueb-faqe për të famshëm kanë raportuar se Spears është vizituar nga personaliteti televiziv Dr. Phil McGraw gjatë qëndrimit të saj të shkurtër në spital por kjo është mohuar nga zëdhënësja e spitalit Cedars-Sinai.
Ish diva e muzikës pop ka humbur kujdestarinë e fëmijëve pasi jeta e saj mori teposhtën me t’u shkurorëzuar nga bashkëshorti i saj në nëntor të 2006-ës. Në vitin më të trazuar të saj prej se u bë e famshme, Spears u shkurorëzua dy herë, rroi kokën, hyri në rehabilitim, u paraqit para publik pa të brendshme dhe u shkarkua nga kompania e saj menaxhuese.
Ajo u bë e famshme më 1999. Në tetor, këngëtarja iu rikthye skenës muzikore me singëllin "Gimme More" dhe albumin "Blackout", i cili për një kohë të shkurtër qëndroi në vendin e dytë në toplistat e pop albumeve më të mira në Amerikë.