Prishet tradita e ceremonisë “Globi i Artë”

Ceremonia e shpërblimeve “Globi i Artë” është anuluar për t’u zëvendësuar me një konferencë për media për shkak të grevës së skenaristëve, të cilët po kërkojnë të ardhura më të mira. Fituesit do të bëhen të ditur gjatë një konference, e cila do të zgjasë një orë, duke zëvendësuar kështu darkën e zakonshme dhe ceremoninë e ndarjes së “globeve të arta”.
Aktorët kanë thënë se nuk do t’i braktisin grevistët, pra do t’i mbështesin skenaristët deri në fund.
Shoqata amerikane e skenaristëve ka hyrë në grevë që nga nëntori lidhur me të ardhurat e mbledhura nga shkarkimet e filmave në internet si dhe shitjet e DVD-ve, të ardhura këto nga të cilat asnjëherë nuk përfitojnë skenaristët, por vetëm kompanitë filmike.
Konferenca përmes së cilës do të bëhen të ditur më të mirët e vitit në film dhe televizion do të zërë vend të dielën në Beverly Hills në kohën lokale 6:00 pasdite.
“Jemi shumë të mërzitur që ceremonia e përvitshme nuk do të mbahet sivjet dhe miliona shikues nuk do të mund ta shohin këtë ngjarje madhështore dhe idhujt e tyre”, ka thënë Jorge Camara, kryetar i Shoqatës së gazetarëve të huaj në Hollivud.
Shoqata në fjalë, e cila organizon ceremoninë është përpjekur të gjejë një kompromis që të mbahet ceremonia, mirëpo përpjekjet duket të kenë qenë të kota.
Lidhur me situatën e krijuar aktori George Clooney ka thënë se “shpresojmë që të gjithë aktorët e nominuar do të bojkotojnë ceremoninë derisa të gjitha problemet të zgjidhen”.
Mbetet të shihet nëse problemet do të zgjidhen deri se të vijë koha kur ceremonia kryesore që nderon kineastët, Oskar, të mbahet në fund të shkurtit.