Greta Koçi do të këndojë përkrah Toto Cutugnos

E pabesueshme, por është e vërtetë... Greta do të këndojë përkrah Toto Cutugnos në një koncert që do të mbahet në stadiumin e qytetit të Shkodrës, më datën 1 maj këtij viti, pikërisht në Festën e Punëtorëve.
Lajmi është bërë i ditur nga vetë këngëtarja, dhënë ekskluzivisht për gazetën Korrieri. "Ne agjendën time kam një projekt shume të rëndësishëm, që lidhet me një koncert madhështor, së bashku me Toto Cutugnon. Koncerti do të bëhet në qytetin e Shkodrës, më datën 1 maj, ku unë do të këndoj një pjesë të mirë të repertorit tim, shoqëruar nga një trupë baleti", ka thënë ajo.
Pavarësisht se Cutugno i përket një brezi krejt të panjohur për Greten, ajo nuk stepet, por ka filluar të njihet me repertorin e këtij të fundit: "Cutugno dhe fama e tij deri në momentin që mora ftesën ishin të panjohur për mua, pasi vetë mosha që kam nuk më favorizon. Por familja ime më ka folur për vlerat dhe cilësitë e këtij këngëtari, ndërkohë që tani po njihem me krijimtarinë e tij".
Greta do të këndojë live këngët më të zgjedhura nga repertori i saj dhe më gjerë, ndërkaq, edhe vetë Cutugno do të jetë i shoqëruar nga një grup i madh instrumentistësh dhe balerinësh, enkas për koncertin.
Mbrëmja do të jetë e përmasave gala dhe si kryefjalë do të ketë duetin Cutugno-Greta Koçi, shoqëruar edhe nga surpriza të mëtejshme. Aktiviteti është mundësuar nga Konsullata Italiane e qytetit të Shkodrës, në bashkëpunim me "Living Room".