Aleksandër Gjoka, për herë të parë me një videoklip

I distancuar tërësisht nga klipet dhe në mënyrë të veçantë nga muzika komerciale Aleksandër Gjoka duket se ka lëshuar pak pe.Sigurisht jo në drejtim të cilësisë së të kënduarit (gjë në të cilën Sandri nuk do të toleronte kurrë), por në drejtim të mënyrës me të cilën ai shkon tek publiku. Sepse duket se Sandër Gjoka ka vendosur të realizojë klipin e tijtë parë. E vërteta është, që pavarësisht faktit, se shumë prej këngëve të tij janë të pëlqyera dhe të dashura në publik, pothuajse asnjë prej tyre nuk dëgjohet në kanalet muzikore shqiptare. Nga ana tjetër duket se Sandrit i kanë mjaftuar performancat live në disa lokale të zgjedhura për të qenë pranë fansave. Ai nuk ka munguar gjithashtu edhe si i ftuar special në koncerte apo spektakle po kaq speciale.
Por ne kemi mësuar, se së shpejti Aleksandër Gjoka do të jetë në një prej kanaleve muzikore shqiptare me një videoklipe. Xhirimet për klipin nuk kanë nisur ende, por mësojmë se ato do të realizohen nga “Max production”. Nga ana tjetër nuk dimë nëse Aleksandër Gjoka do të realizojë klip për ndonjë prej këngëve të tij të njohura, apo ndoshta ka realizuar diçka të re, për të ardhur ndryshe tek publiku, por si gjithmonë me zërin e tij të spikatur.