Ne grup apo për qejf?

Nuk dihet nëse janë ribashkuar për të vazhduar rrugën drejt suksesit apo kjo është thjesht një dëshirë e momentit, për të sjellë një këngë sëbashku. Prej pak ditësh në kanalin televiziv Supersonic TV transmetohet një këngë e cila risjell bashkë grupin “The dreams”.

Në vend të Ermalit tashmë është Flori një prej themeluesve të këtij grupi që në vitet ’90. Flori, Soni dhe Eriosti kanë konkluduar kështu një material muzikor duke provuar sërish suksesin në grup. Kënga mban titullin “Dedikuar nënës” dhe teksti është shkruar nga Getoari, një mik tashmë mjaft i mirë për Flori Mumajesin.

Nuk dihet nëse ky bashkëpunim do të vazhdojë më tej apo thjesht është një rikthim për të përshëndetur të gjithë fansat e krijuar prej kohësh të tre djemve simpatikë. Ermal Mamaqi i cili iu bashkangjit grupit pas largimit të Florit nuk është pjesëmarrës në këtë bashkëpunim të ri të “The Dreams”.

Sikurse dikur Flori, ai u largua për të realizuar projektet e tij private siç janë rolet mjaft të spikatura të tij në “Portokalli” me anë të grupit “Thë SHBLSH” apo materialet e tij vetjake muzikore. Në faqen në internet jepen komente të shumta në lidhje me këtë rikthim ku lavdërohet puna e tre djemve dhe nostalgjia që kanë sjellë tek fansat e tyre, kryesosht vajzat.