Ingrit Gjoni braktis silikonin, më mirë vitamina

Pas “Barbie silicon” është radha e “Vitamina”. Shumë shpejt Ingrit Gjoni do të lançojë këngën e saj të re. Muzika e Adi Hilës dhe teksti i Rozana Radit e sjellin këtë radhë këngëtaren me ritme regaton, që ndonëse i përshtaten më mirë stinës së verës besohet, se do të tingëllojnë të këndshme edhe në dimër. Kënga do të shoqërohet edhe me një videoklip të realizuar nga “Max production”. E ndërsa ka përfunduar pjesën e parë të xhirimeve, Ingriti do të realizojë së shpejti edhe vazhdimin e tyre, për ta prezantuar këngën brenda pak ditëve në ekranin muzikor BBF.
Nga sa mësojmë, xhirimet janë realizuar në katër ambjente të ndryshme, e po kështu në imazhe të ndryshme shfaqet edhe këngëtarja, e cila si gjithmonë veshjet ia ka besuar stilistes Rezarta Skifteri. Ndonëse në pamjen e Ingritit nuk do të ketë ndryshime të ndjeshme, që lidhen me kaçurelat apo flokët e krehur, flitet se kënga që ka zgjedhur, do e prezantojë atë në një stil tjetër. Ndërkohë, duket se në lidhje me jetën e saj private, ende nuk po shihen të reja në horizont.
Këngëtarja është parë shpesh në shoqërinë e femrave, duke i shpëtuar në këtë mënyrë faqeve rozë të gazetave, por edhe thashethemeve rreth ndonjë mashkulli të mundshëm në jetën e saj. Madje si për ta vërtetuar këtë fakt, edhe në festën e ditëlindjes mbrëmjen e 25 dhjetorit pranë Ingritit ka pasur vetëm femra.