Eda Zari lë nënshtetësinë shqiptare

Eda Zari nuk do të mbajë më shtetësinë shqiptare. Këngëtarja mjaft e suksesshme nëpër botë, e cila prej disa vitesh jeton në Gjermani, e ka bërë vet kërkesën për heqjen e nënshtetësisë shqiptare.
Emri i saj renditet mes 44 të tjerëve, për të cilët presidenti i Shqipërisë, Bamir Topi, ka dekretuar në datën 16 janar 2008 lënien e nënshtetësisë.
Ndonëse në skenat ku është ngjitur ajo ka promovuar muzikën shqiptare duke e përpunuar suksesshëm, duket se kjo kërkesë e saj ka qenë e detyruar.
Sipas ligjeve të shtetit gjerman, për të marrë nënshtetësi gjermane, duhet që më parë të heqësh dorë nga nënshtetësia e origjinës. Kjo nuk ka kursyer as këngëtaren e njohur shqiptare.
E njohur së fundmi për përpunimet e muzikës në rrymën jazz, Eda Zari e ka zbritur atë në nivelet ku mund ta shijojnë gjithnjë e më shumë një publik i gjerë.