Rezarta Shkurta martohet

Këngëtarja dhe i fejuari i saj janë celebruar zyrtarisht pak ditë më parë
Rezarta Shkurta është martuar. Vetëm disa ditë më parë, ajo është celebruar zyrtarisht si bashkëshortja e ligjshme e Ermalit, në bashkinë e kryeqytetit. Lajmi vjen këtë radhë, jo nga vetë këngëtarja, por nga mikesha shumë të afërta të saj, të cilat nuk ngurrojnë ta nxjerrin “sekretin” dhe tregojnë, se tashmë çifti ka hedhur një hap më tej në konsolidimin e lidhjes së tyre. Edhe pse në fillim të vitit, në një intervistë për gazetën “Panorama”, vetë Rezarta kishte treguar se në projektet e saj ishte edhe martesa, askush nuk e kishte menduar, që gjërat do të zhvilloheshin kaq shpejt. E për më tepër nuk kishim menduar, se hapat e saj drejt martesës do të nisnin me celebrimin.Siç tregojnë mikeshat e afërta të këngëtares, ka qenë Ermali ai, që ka iniciuar lidhjen e tyre në celebrim, por sigurisht edhe me dëshirën e plotë të Rezartës. Me sa duket, projektet, që kishte për vitin 2008 këngëtarja
nga Durrësi ka nisur t’i bëjë realitet, që në muajt e parë të këtij viti. Nuk dimë nëse, që nga ky moment në daljet e saj skenike biondja simpatike do të vazhdojë të prezantohet si
Rezarta Shkurta, apo do të preferojë mbiemrin e bashkëshortit, Hoxha. Kjo mbetet për t’u parë. Nga ana tjetër të njëjtët persona, mikesha të këngëtares pohojnë, se shumë shpejt çifti do të realizojë edhe ceremoninë martesore, ndonëse për këtë nuk dihet data e saktë. Siç kishte treguar edhe vetë më parë Rezarta ka menduar një ceremoni të ngushtë familjare,
me njerëzit më të afërt, por natyrisht tepër të veçantë. Dhe duke ditur natyrën surprizuese të këngëtares, që gjithmonë pëlqen të bëjë gjëra të çmendura, por të bukura besojmë, se edhe ceremonia e saj e martesës do të jetë vërtet ashtu siç ka premtuar ajo. Celebrimi dhe projektet e këngëtares për martesë, vijnë pasi një idhjeje të qëndrueshme dhe bashkëjetesës në krah të Ermalit. Duket se pikërisht bashkëjetesa ka ndikuar shumë pozitivisht në zhvillimet e mëtejshme në lidhjen e tyre. Shpesh në intervista këngëtarja ka
pranuar, se tashmë karakteri i saj si vajzë e përkëdhelur ka ndryshuar, e madje ka nisur t’i marrë dorën edhe gatimit, një pikë dikur e dobët e Rezartës. Çifti është njohur thuajse dy vjet më parë, në mënyrë krejt rastësore, ndërsa pas fejesës kaluan në bashkëjetesë.
Dhe duket se impenjimi sentimental, ndryshe nga sa mund të mendohej ndikoi pozitivisht edhe tek muzika. Vitin e shkuar, këngëtarja nxori në treg albumin e saj të parë, ndërsa daljen e saj të më të afërt, publiku e pret në “Top fest”, ashtu siç ajo vetë ka premtuar.