Jolie për mbetjen e amerikanëve në Irak

Aktorja dhe humanistja amerikane, Angelina Jolie, i ka deklaruar gazetës amerikane “Washington Post” se trupat amerikane duhet të mbesin ende në Irak për shkak se do të ndihmojnë në përmirësimin e kushteve të civilëve irakianë.
Ajo ka theksuar se që nga muaji gusht kur e kishte vizituar për herë të fundit Irakun, kushtet e refugjatëve të brendshëm irakianë kanë mbetur pothuajse të njëjta. Komandanti i trupave amerikane në Irak, Petraeus, “më ka thënë se po bëhen përpjekje të shumta për adresimin e krizës humanitare”, ka thënë Jolie, duke kërkuar nga qeveritë perëndimore më shumë ndihmë për Irakun. Ajo është ambasadore e vullnetit të mirë të OKB-së që nga viti 2001.