James Blunt sonte në Tiranë

Sonte në mbrëmje, këngëtari i famshëm britanik, James Blunt, do të këndojë live për mijëra fansa shqiptarë, të cilët e njohin atë, sidomos me superhitin, "You‘re beautiful", të vitit 2005.
Blunt mbërriti dje në Tiranë dhe deklaroi për "Top Channel" se shpresonte që këngët e tij të njiheshin prej shqiptarëve e të këndoheshin bashkë me të gjatë koncertit të madh që do të mbahet në stadiumin "Qemal Stafa".
Në Tiranë, James Blunt, vjen për herë të parë, por tokën shqiptare e shqiptarët i njeh nga karriera e tij ushtarake si ushtar në kontingjentin britanik të forcave të KFOR-it në Kosovë. Gjatë shërbimit në këtë vend shkroi këngën "No Bravery".
Ndërsa albumin e tij të parë, "Back to Badlem", i cili menjëherë tërhoqi vëmendjen e kritikëve muzikorë që e vlerësuan maksimalisht, e hodhi në treg në vitin 2005. Kënga e tretë e CD-së, "You‘re Beautiful" u kthye më pas në hit, gjë që e bëri James Bluntin të jetë artisti i parë britanik, prej kohësh, i cili kryesoi për javë të tëra top-listat amerikane.
Britaniku i fundit që kishte bërë një gjë të tillë ishte Elton John. James Blunt ka marrë dhjetëra nominime për çmime prestigjioze, mes të cilave edhe "Grammy" dhe është vlerësuar në 2006-ën si artisti më i mirë britanik dhe artisti më i mirë i muzikës pop në ceremoninë "Brit Awards".
Albumi i tij i fundit "All The Lost Souls", promovimi i të cilit u bë synim i turneut mbarëbotëror dhe ndalesës në Shqipëri, u hodh në treg më 17 shtator të vitit 2007. Koncerti i James Blunt mbështetet nga "Top Channel" dhe "Top Albania Radio".