Alonso: S'kam frikë nga Hemilton! / Formula 1

Titulli: Alonso: S'kam frikë nga Hemilton! / Formula 1 15/11/2007, 19:10

Ky sezon do të jetë shumë i vështirë, për shkak se unë jam në një skuadër të re dhe me konkurrencë tepër të ndezur. Por unë nuk trembem nga askush, aq më tepër, nga shoku im i skuadrës"

Alonso: S'kam frikë nga Hemilton! / Formula 1 026535

Në pistën e Katalonjës në Spanjë, kampioni i Botës në fuqi, Fernando Alonso, përfundoi vetëm në vendin e tretë. Gjithsesi, me katër gara të zhvilluara deri tani kampionati është më i hapur se kurrë, aq sa dy pilotët e McLaren dhe rivalët e Ferrarit kanë shanse të barabarta për titull. Në një intervistë me shtypin gjerman, Fernando Alonso flet për imazhin e tij, një rival të vjetër, si Mikael Shumaker, konkurrentët e tij më të fortë në këtë Botëror, si edhe shanset e titullit.

Si është e mundur që ju jeni shumë miqësor në komunikim direkt, ndërkohë që në publik shfaqeni me një imazh krejt tjetër?

Kjo është normale. Kur shfaqesh në media dhe në reklama, kur njerëzit të shikojnë aq shpesh, atëherë zgjedhin për të të pëlqyer ose për të të urryer. Gjërat janë të thjeshta. Ka njerëz që shprehin mendime për mua, edhe pse nuk kanë kontaktuar asnjëherë me mua.

A mendoni se disa veprime apo thënie të të tjerëve ju kanë dëmtuar?

Them se gjëra të tilla s'kanë shumë peshë. Kur dikush nuk të pëlqen apo pikturon një figurë të keqe tënden, atëherë thuhet gjithçka kundër teje. Nëse 100 njerëz kërkojnë një autograf dhe ti formos vetëm për 98 prej tyre, atëherë dy të tjerët do të fillojnë të flasin e të ankohen.

Edhe pse ju përkufizoheni si një tip i vështirë, a vazhdoni të ruani marrëdhënie të mira me ish shokët e skuadrës, Xhankarlo Fizikela dhe Jarno Truli.

Unë s'kam marrëdhënie të këqija me asnjë, si kur vjen puna me shokun e skuadrës ashtu edhe me ish shokët e skuadrës, me mekanikët, inxhinierët, sponsorët apo ish shokët e shkollës. Unë kam miq të mirë, jam kuptuar gjithmonë shumë mirë me të gjithë, edhe pse në disa raste është thënë dhe është menduar e kundërta, se unë jam një tip i vështirë. Ata që nuk më njohin mund të thonë çfarë të duan.

A e shikoni veten të ndryshuar, në krahasim me periudhën që filluat të garonit në Formula 1?

E shikoj veten më të sigurt. Kur debutova në Formula 1 me skuadrën e Minardit erdha në një botë të vështirë, në një botë të panjohur për një spanjoll, e cila dukej shumë e largët dhe e paarritshme. Unë e njihja shumë pak gjuhën angleze, isha shumë nervoz dhe aspak i qetë. Me kalimin e kohës kam arritur të fitoj besimin në vetvete. Gjithçka që bëj tani, e bëj me një siguri shumë më të madhe se më parë.

Po si karakter, a keni ndryshuar?

Eshtë pothuajse e njëjta gjë. Unë debutova në Formula 1 në moshën 19 vjeç me shumë shpresa, por edhe disi i drojtur. Tani, unë provoj të pilotoj edhe përtej mundësive të mia, për të treguar gjithë vlerat që kam. Tani jam tip shumë më i shtruar.

A mendoni se një pilot duhet të ketë karakater shumë të fortë, për t'i rezistuar presionit të mediave, të skuadrave dhe të kolegëve?

Këtu ne flasim për një sport për pakicën, jo për masën e gjerë; aktualisht, janë 22 pilotë që garojnë në Formula 1 dhe zhvillohen vetëm 17 gara në vit. Ditët e tjera dëgjon të flitet dhe të shkruhen gjëra nga më të ndryshmet. Sigurisht që mund të dëgjosh gjëra që të vrasin, por kështu është bota e Formula 1.

Pra, ju mendoni se presioni është tepër i madh?

Ne kemi mbi supe presionin e sponsorëve, atë të mijëra njerëzve që kanë punuar me makinën, presionin e spektatorëve, të shtypit, të familjes... Të gjithëve duhet t'u japësh të drejtë. Por ti nuk duhet të ndikohesh nga e gjitha kjo. Në këtë pikë duhet të ruash gjakftohtësinë.

Si e vlerësoni ju veten?

Si një person shumë normal. Tepër normal. Nganjëherë e ndiej veten të rrethuar nga njerëz të çuditshëm. Unë jam një djalë 25- vjeçar, të cilit nuk i pëlqen shumë sorollatja dhe humbja e kohës. Më pëlqen sporti. Jam tip luftarak. Dua të fitoj gjithçka dhe e kaloj kohën me gjëra shumë normale, si me biçikletën time, duke luajtur futboll, me shokët, duke shkuar në kinema, e plot gjëra të tjera si këto.

A ju ka dhënë më shumë stabilitet lidhja juaj me këngëtaren Rakuel del Rozario? A mendoni për fëmijë me të? A mund të luajë familja një rol në të ardhmen tuaj në Formula 1?

Jo, uroj që të mos luajë një rol në përcaktimin e së ardhmes në këtë sport.

I keni prerë flokët shkurt, dhe tashmë te McLareni keni një imazh të ri. Mos ndoshta e keni bërë këtë për t'u ndarë me të kaluarën tuaj te Renoja?

Pak, po! Flokët nuk kanë lidhje me këtë, por unë doja ta filloja nga zeroja.

Të flasim pak për garat. Nganjëherë është krijuar përshtypja se Hemilton është rivali juaj i vërtetë, dhe jo Ferrari.

Duhet të presim akoma për të parë si do të rrjedhin gjërat. Te Renoja unë kam zhvilluar shpesh dyluftime me Trulin dhe Fizikelën; ata ishin shumë të motivuar për të fituar Botërorin. Por, në fund, ata përfunduan shumë mbrapa meje. Eshtë normale që në këtë pikë të sezonit të katër pilotët e dy skuadrave më të mira të presin shumë gjëra nga vetja, si dhe të kërkojnë fitoren. Por unë mendoj se Botërori do t'i gjejë vetë kandidatët e tij. Dy apo tre do të qëndrojnë në garë, dhe unë uroj që të jem mes tyre. Unë e di që te McLareni ka ekzistuar gjithmonë lufta brenda skuadrës, pasi ajo është stimuluar edhe nga vetë drejtuesit. Për sa kohë mekanikët dhe inxhinierët ndikojnë pozivitisht në këtë garë, duke zhvilluar maksimalisht makinën, në mënyrë që njëri nga ne ta mundë tjetrin, duke mundur kështu edhe Ferrarin, unë jam shumë dakord me këtë.

A mendoni se për titullin do të luftoni ju dhe Raikonen, apo do të ketë të tjerë?

Unë e uroj një gjë të tillë. Në fakt, ky është mendimi im. Në fund do të mbeten dy pilotë dhe unë do të jem mes tyre. Nëse do të jetë Raikonen, Masa apo Hemilton, kjo mbetet për t'u parë. Por, padyshim që Raikonen është më i avantazhuar në këtë garë.

Keni thënë dikur se titujt i fitojnë makinat, jo pilotët. A mendoni se juve mund t'ju thyejë dikush që ka një makinë jo shumë të mirë?

Bëhet fjalë për një nga thëniet e mija që janë keqinterpretuar. E kam thënë këtë kur isha me një Minardi. Edhe pse jepja maksimumin, dilja gjithmonë i fundit; humbisja tri sekonda për xhiro dhe, sigurisht që fajin për këtë e kishte më së shumti makina. Unë nuk e dija, nëse atëherë mund të më mundte dikush me një makinë më të dobët.

A ju ka marrë malli për Mikael Shumakerin?

Jo. E kemi pasur për 14 vjet në Formula 1 dhe mua personalisht nuk më ka marrë malli. Nuk them që nuk më pëlqen të garoj kundër tij, por nuk më ka marrë malli. Tani ka emra të tjerë, si Masa, Raikonen, Hemilton, të gjithë në moshën nga 22 deri në 27 vjeç. Me Mikaelin arritëm në një pikë që gjërat u bënë monotone. Ky ndryshim i ka bërë mirë edhe Formula 1.

Synimi juaj është të fitoni tre tituj, duke u rreshtuar përkrah Eirton Senës. Nëse do ta arrini këtë, a do të sulmoni rekordin e shtatë titujve të Shumakerit?
Unë i shoh gjërat vit pas viti. Nëse do të fitoj titullin e tretë, atëherë do të rivlerësoj objektivat e mija. Kur isha fëmijë dhe luaja me makina, nuk kisha ëndërruar asnjëherë të vija në Formula 1 dhe të fitoja titullin, apo tre tituj. Por, sigurisht që, nëse e fitoj titullin e tretë sezonin pasardhës nuk do të futem në garë, thjesht për ta përfunduar atë, por do të provoj të fitoj titullin e katërt, të pestë, të gjashtë e kështu me radhë. Shtatë tituj më duken pak si shumë.

A mendoni se këtë vit do të fitoni titullin e tretë?

Kësaj pyetjeje nuk mund t'i jap dot një përgjigje. Nuk e di. Kam besim se do t'ia arrij, si dhe kam një ndjesi të mirë, por vetëm kaq. Ky sezon do të jetë shumë i vështirë, për shkak se unë jam në një skuadër të re, si dhe me një konkurrencës tepër të ndezur. Por unë nuk kam frikë nga askush, aq më tepër, nga shoku im i skuadrës, Hemilton.

Alonso: S'kam frikë nga Hemilton! / Formula 1 Alonsopodium