Një klerik musliman martohet me një vajzë 12 vjeçare.

Një klerik mysliman ka shkaktuar mllef publik në Indonezi, pasi që u martua me një vajzë 12 vjeçare.


Pujianto Cahyo Widianto e martoi vajzën në qytetin qendror të Javës, Semarangun, në një ceremoni religjioze, jozyrtare.
Thuhet se ai e zgjodhi atë nga një grup prej 20 vajzave, para se të fluturonte në Singapur me nusen e tij të re, si dhe me gruan e tij të parë.
Policia ka nisur një hetim mbi këtë incident.
Akuza të mundshme Hetuesit nga agjencia indoneziane për mbrojtjen e fëmijëve thanë se z. Widianto e kishte zgjedhur vajzën bazuar në inteligjencën e saj, pjekurinë dhe zhvillimin fizik. Ata thanë se z. Widianto, i cili udhëheq një shkollë islamike me konvikt, kishte planifikuar ta vinte këtë fëmijë në krye të biznesit të tij të dytë, një punëtori kaligrafie.
Nuk është e qartë nëse martesa është përmbushur. Nëse ka ndodhur kjo, Widianto mund të përballet me akuza në bazë të ligjeve të mbrojtjes së fëmijëve, martesës dhe punës.
Thuhet se ai ka justifikuar veprimet e tij duke thënë se po krahasohej me profetin Muhammed të islamit dhe se do të priste gjersa gruaja e tij ta arrinte pubertetin,
para se të ketë marrëdhënie seksuale me të. Por ka pasur reagime të tërbuara ndaj kësaj martese përbrenda Indonezisë.
Një anëtar i lartë i partisë së mirënjohur islamike, PKS, tha se ai mendonte që z. Widianto po gabonte në veprimet e tij, dhe po gabonte në mënyrën se si po mendonte për islamin.
Policia thotë se ata nuk kanë kërkuar nga Singapori që të ekstradojë klerikun, por se po vazhdojnë hetimet.
BBC