NORA: Nuk e njoh zv/shefin e UNMIK. Raporti OKB-së, fals

Pas lajmit te publikuar në ‘Blue tooth’ për ‘dobësitë’ e zv.shefit të UNMIK-ut Steven Schook ndaj ty këngëtareve të mirënjohura kosovare, Jehona Sopi dhe Nora Istrefi vjen dhe reagimi i kësaj të fundit. ‘Jam ndier së tepërmi e revoltuar, e indinjuar dhe e prekur thellë kur mësova përmes medias lajmin e ndërlidhjes time me këtë aferë. Është hera e parë që po dëgjoj për këtë si dhe për vetë kryeprotagonistin e kësaj afere, z.Steven Schook. Duke mos u pajtuar me heshtjen karshi një damkosje që tentohet të më mëveshët në mënyrë kaq të padrejtë dhe pa asnjë mbulesë faktike, deklaroj botërisht se çfarëdo ndërlidhje e emrit tim me aferën e përfolur të këtij zyrtari të UNMIK-ut, është një gënjeshtër e kulluar, një e pavërtetë shumë e ulët dhe një shpifje me prapavijë tejet tendencioze kundër personalitetit tim. Duke i kuptuar të gjithat vetëm si insinuata për t`më diskredituar, garantoj me tërë qenien time se unë Nora Istrefi nuk kam qenë dhe nuk jam e përfshirë në një aferë të tillë apo çfarëdolloj afere tjetër, madje as që jam njohur ndonjëherë apo njihem me z.Steven Schook. Nuk kam patur asnjë njohuri përkitazi me këtë aferë, e aq me pak ndonjë “lidhje personale” me këtë zyrtar të UNMIK-ut ose cilindo zyrtar a nëpunës ndërkombëtar në Kosovë.’- shprehet këngëtarja Kosovare. Sipas saj duke qëndruar jashtë lidhjeve në këtë aferë gjithcka është një gënjeshtër pa kuptim. ‘Përafërsisht e di se kush qëndron prapa kësaj fushate por këtë gjë do të përpiqem ta zbardh përmes rrugës ligjore. Do të kërkoj drejtësi deri në OKB’’ thekson ajo.
Kujtojmë se pas publikimit të lajmit në mediat kosovare reagimi i parë ka mbërritur nga këngëtarja Jehona Sopi e cila sikurse dhe Nora i ka quajtur të gjitha akuzat si trillime të pabaza.
Ndërkaq raportet e fundit të OKB-së që hetojnë zv.shefin e UNMIK-ut Steven Schook, kanë pohuar se i dyti i administratës ndërkombëtare ka lidhje shumë të afërta me shumë kosovarë, e nder to edhe me këngëtaret e njohura. Është pohuar se ai i ka pikë të dobët vajzat, ndërkohë që në kryeqytetin kosovar, Schook njihet si një “merakli” i femrave të bukura.