Merita Tocila prezanton koleksionin vjeshte-dimer

Merita Toçila prezanton koleksionin vjeshtë-dimër brenda Piramidës
Stilistja: Moda amatore në Shqipëri, në kufijtë e spontanitetit
Petrika Grosi

Mbrëmjen e së mërkurës, në ambientet e Qendrës Ndërkombëtare të Kulturës, për mëse 40 minuta, stilistja e re Merita Toçila prezantoi koleksionin “vjeshtë-dimër”. Është e para personale e saj. “Retrospektivë nga vitet ’50” quhej kjo sfilatë mode gjatë së cilës 10 modele prezantuan rreth 40 veshje të stilistes Toçila. “Jam e lumtur që arrita pas kaq e kaq përpjekjesh ta realizoj këtë sfilatë që patjetër do pasohet nga të tjera në të ardhmen”,- shprehet Toçila. Ajo shpjegon se moda në vendin tonë ka mbetur në kufijtë e spontanitetit dhe është një fushë që ka nevojë për lëvizje, iniciativë, investim dhe kurajo për të guxuar. Pra gjithçka në këtë sektor kaq të rëndësishëm që në vendet e zhvilluara është kthyer një ndër bizneset më fitimprurës, fatkeqësisht në Shqipëri është fare i papërfillshëm. Ndoshta mund të shihet ndonjë përpjekje e zbehtë për të çarë mjegullën, por sërisht gjithçka mbetet në tentativë.

Sfilatat janë të pakta, niveli i tyre lë për të dëshiruar, e po kështu edhe vëmendja ndaj tyre. “Nuk ka qenë aspak e lehtë gjetja e sponsorëve, - tregon Toçila - ndaj këtu gjej rastin të falenderoj veçmas të tjerëve sponsorin e përgjithshëm, zonjën Brixhida Kokëdhima”. Por le të ndalemi pak tek sfilata, ajo çka pamë dhe shijuam bashkë me të ftuarit e pranishëm, të cilët i duartrokitën në çdo dalje e prezantim në pasarelë të modeleve. Duke u bazuar në traditën e modës që po krijohej në vitet ’50, sigurisht shkrirë me tendecat moderne, stilistja sjell veshjet bardhë e zi ku luhet me përdredhjet e copës, fjongot e zgjatura, jakat e shumëllojshme etj.

Por kjo ishte vetëm njëra pjesë e sfilatës. Në disa veshje shfaqen tendencat e fundit të modës, apo performanca me të cilat stilistja fitoi admirimin e spektatorëve. Si sfilatë e parë, mund të thuhet se ishte sukses për Merita Toçilën të cilës i urojmë të vazhdojë rrugën e vështirë të saponisur. Një karakteristikë tjetër që të binte në sy ishte individualiteti i krijimeve, kombinimi i veshjeve me karakteristikat e secilës modele. Por Merita nuk është vetëm stiliste, ajo prej kohësh edhe pikturon, madje ka marrë pjesë në ekspozita të ndryshme. Toçila zbulon planet për të ardhmen dhe na rrëfen gjithashtu se së shpejti nga shtatori ose fundviti, do të paraqitet bashkë me një piktor tjetër në një ekspozitë të përbashkët, ndoshta në Galerinë Kombëtare të Arteve.