Dasma e çiftit Sarkozy-Bruni në fillim të shkurtit ?

Presidenti francez Nicolas Sarkozy mund të martohet me këngëtaren italiane dhe ish-manekinen Carla Bruni në fillim të muajit të ardhshëm, kështu ka raportuar një e përditshme franceze duke cituar një burim anonim.

Sipas kësaj gazete Sarkozy i ka dhuruar Brunit një unazë fejese prej diamanti dhe në këmbim ka pranuar një orë të markës Swiss.
"Ata do të martohen! Më 9 shkurt?" shkruan në ballinën e gazetës ku është paraqitur një fotografi e çiftit, të dy me syze, derisa ishin në vizitë Jordani, gjatë vikendit. Thuhet se çifti Sarkozy/Bruni kanë caktuar datën e martesës, më 8 shkurt ose ndoshta 9 shkurt.
Zyra e presidentit francez ka refuzuar të komentojë lidhur me këtë.
Raporti koincidon me publikimin e rezultateve të një sondazhi në Francë sipas së cilit ka rënë për 7% besimi i francezëve ndaj presidentit të tyre, kryesisht për shkak të brengave lidhur me ekonominë në Francë por edhe për shkak të jetës së tij private.
Çifti, që u takua në një ndejë gjatë muajit nëntor vetëm disa javë pasi Sarkozy u shkurorëzua nga gruaja e tij e dytë Cecilia, kohët e fundit është në qendër të vëmendjes së mediave në Francë dhe më gjerë. Vetëm nga nëntori ata kanë vizituar disa vende të ndryshme të botës, përfshirë Disneyland-in dhe Egjiptin.
Pas vizitës në Egjipt muajin e kaluar, gjatë së cilës Sarkozy ishte kritikuar se kishte përdorur një avion privat që i përkiste njërit prej biznesmenëve më me ndikim në Francë, ai dhe Bruni kanë vizituar Jordaninë gjatë vikendit, me ftesë Mbretit Abdullah të këtij vendi.
Sarkozy do të vizitojë Arabinë Saudite gjatë javës së ardhshme por të dielën një zyrtar arab ka bërë të ditur se Bruni nuk do ta shoqërojë atë për shkak se feja islame nuk njeh marrëdhëniet jo-martesore.
Protokolli në Arabi Saudite lejon që vetëm bashkëshortet e udhëheqësve të shoqërojnë bashkëshortët e tyre gjatë vizitave që ia bëjnë këtij vendi.
"Zonjusha Bruni nuk do të vijë në Riad për arsye të qarta" ka thënë me kusht anonimiteti një zyrtar i qeverisë Saudite. Ai nuk ka dashur të elaborojë se për çfarë arsyesh është fjala.