Agim Faja

Në kuadër të muajit të kulturës kombëtare në Shqipëri dhe në Kosovë, u prezantua në qytetin e Prizrenit libri "Gjashtë ditë në tokën ëndërr", shkruar nga Piktori i Merituar Agim Faja.


Sekretari i shoqatës "Pal Engjëlli", Halim Maloku, tha për ATSH-në se "libri i piktorit Agim Faja përmbledh përshtypjet e udhëtimit në Kosovë, që artisti i mirënjohur nga Shijaku ka kryer dy vjet më parë, gjatë një veprimtarie tjetër të përbashkët kulturore'.

Piktori Agim Faja, i cili është mjaft i njohur si ilustruesi i abetares së gjuhës shqipe, ka shkruar disa monografi dhe libra historikë.

Në ceremoninë e promovimit, drejtori i Departamentit të Kulturës dhe Arsimit në komunën e Prizrenit, Urim Ukymeri, vlerësoi librin e artistit Faja si "një dëshmi e kulturës dhe vlerave të përbashkëta të shqiptarëve në të dy anët e kufirit".